Baydhabo, (insidesomalia.org)- Xildhibaano ka tirsan baarlamaanka Dowladda Federaalka KMG ah ee Soomaaliya ayaa shalay gaaray Baydhabo, kuwaasoo sheegay in ay dhexdhexaad ka yihiin kala qaybsanaanta soo dhexgashay Baarlamaanka.

Mudanayaashaan oo ka yimid Nairobi ayaa waxay saxaafada kula hadleen Baydhabo iyagoo sheegay inay damacsan yihiin inay dhexdhexaadiyaan xubnaha kala aragtida duwan ee Baarlamaanka kuwaasoo kala raacay Madaxweynaha iyo Ra'iisul wasaaraha.

Xildhibaannada gaaray Baydhabo oo tiradoodu ay ahayd 13 ayaa waxaa ka mid ahaa Bashiir Maxamed Aadan (Dhuuracaso), Ibraahim Xabeeb Nuur, Maxamed Cabdi Xayir (Maareeye) iyo kuwo kale, waxayna dhamaantood sheegeen inay dhexdhexaad ka yihiin xarig jiidka ka socda gudaha Baarlamaanka.

"Qorshaheenu wuxuu yahay inaan isugu keeno mudanayaasha baarlamaanka hal meel aana u sheegno in khilaafku uu sababi karo in baarlamaanka uu burburo" ayuu yiri Xildhibaan Dhuuracaso.

Xildhibaan Maareeye ayaa isaguna sheegay in baarlamaanku uu yahay dhedhexaad, isla markaana ay ku qaldan yihiin mudanayaasha qaarkood inay raacaan dhinac gaar ah, ayna ogaadaan inay u shaqeeyaan shacabka, balse aysan u shaqeyn madaxda Dowlada.

Baarlamaanka ayaa u muuqada inuu u qaybsamay laba qaybood oo midi uu taageerayo Madaxweyne Yuusuf, halka midka kalena uu taageerayo Ra'iisul wasaaraha Soomaaliya Nuur Cadde.